ಡಾ.ಎಲ್.ಸಿ. ರಾಜು ಅವರು ಬಹುಮುಖ ಪತ್ರಿಭೆಯುಳ್ಳವರು. ಸಾಹಿತ್ಯದ ಹಲವು ಪ್ರಕಾರಗಳಲ್ಲಿ ಕೃತಿಗಳನ್ನು ರಚಿಸಿದ್ದಾರೆ. ಇವರು ದಿನಾಂಕ 24-/04-/1969ರಂದು ಜನಿಸಿದರು. ತಾಯಿ ಕಮಲಮ್ಮ, ತಂದೆ ಲಕ್ಕಪ್ಪ. ಇವರು ತಮ್ಮ ಪ್ರಾಥಮಿಕ ಮತ್ತು ಮಾಧ್ಯಮಿಕ ತರಗತಿಗಳ ವ್ಯಾಸಂಗವನ್ನು ರಾಮನಗರದ ಛತ್ರದ ಬೀದಿಯಲ್ಲಿರುವ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆಯಲ್ಲಿಯೂ, ಪ್ರೌಢ ಮತ್ತು ಪದವಿಪೂರ್ವ ಶಿಕ್ಷಣವನ್ನು ರಾಮನಗರದ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿಯೂ ಮತ್ತು ಪದವಿ ತರಗತಿಗಳ ವ್ಯಾಸಂಗವನ್ನು ರಾಮನಗರದ ಪುರಸಭಾ ಪ್ರಥಮ ದರ್ಜೆ ಕಾಲೇಜಿನಲ್ಲಿಯೂ ಪೂರೈಸಿದ್ದಾರೆ.

ಇವರು ಬೆಂಗಳೂರು ವಿಶ್ವವಿದ್ಯಾಲಯದ ಜ್ಞಾನಭಾರತಿಯ ಕನ್ನಡ ಅಧ್ಯಯನ ಕೇಂದ್ರದ ಮೂಲಕ ಕನ್ನಡ ಎಂ.ಎ. ಪದವಿಯನ್ನು ಚಿನ್ನದ ಪದಕದೊಂದಿಗೆ ಪಡೆದಿದ್ದಾರೆ. ಜೊತೆಗೆ, ‘ಡಾ.ಜಿ.ಪಿ.ರಾಜರತ್ನಂ ಅವರ ಸಾಹಿತ್ಯದಲ್ಲಿ ವೈಚಾರಿಕ ಪ್ರಜ್ಞೆಯ ನೆಲೆಗಳು’ ಎಂಬ ವಿಷಯವಾಗಿ ನಾಡಿನ ಸುಪ್ರಸಿದ್ಧ ಕವಿ ಡಾ.ಸಿದ್ಧಲಿಂಗಯ್ಯ ಅವರ ಮಾರ್ಗದರ್ಶನದಲ್ಲಿ ಅಧ್ಯಯನ ನಡೆಸಿ ಬೆಂಗಳೂರು ವಿಶ್ವವಿದ್ಯಾಲಯದಿಂದ ಪಿಎಚ್.ಡಿ. ಪದವಿ ಪಡೆದಿದ್ದಾರೆ.

ವೃತ್ತಿಯಲ್ಲಿ ಪ್ರಾಧ್ಯಾಪಕರಾಗಿರುವ ಇವರು ಕೃಷ್ಣರಾಜಪೇಟೆ, ರಾಮನಗರ, ಪಾವಗಡ ಮತ್ತು ನಾಗಮಂಗಲ ಪದವಿ ಕಾಲೇಜುಗಳಲ್ಲಿ ಸೇವೆ ಸಲ್ಲಿಸಿ, ಪ್ರಸ್ತುತ ಬೆಂಗಳೂರಿನ ವಿಜಯನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಪ್ರವೃತ್ತಿಯಲ್ಲಿ ಬರಹಗಾರರಾಗಿರುವ ಇವರು ಕಥೆ, ಕವಿತೆ ಮತ್ತು ನಾಟಕಗಳ ರಚನೆಯಲ್ಲಿ ಗಮನಾರ್ಹ ಕೆಲಸ ಮಾಡಿದ್ದಾರೆ. ಅತ್ಯುತ್ತಮ ನಟರೂ ಆಗಿರುವ ಇವರು ಹಲವಾರು ನಾಟಕಗಳಲ್ಲಿ ನಾಯಕ ಪಾತ್ರಗಳಲ್ಲಿ ಅಭಿನಯಿಸಿ, ಪ್ರೇಕ್ಷಕರ ಮೆಚ್ಚುಗೆಗೂ ಪಾತ್ರರಾಗಿದ್ದಾರೆ. ಅಧ್ಯಾಪಕ ವೃತ್ತಿಗೆ ಬಂದ ನಂತರದಲ್ಲಿ ನಟನೆಯಿಂದ ದೂರ ಉಳಿದು ಅಧ್ಯಾಪನ ಮತ್ತು ಸಾಹಿತ್ಯ ರಚನಾ ಕಾರ್ಯದಲ್ಲಿ ಕ್ರಿಯಾಶೀಲರಾಗಿ ತೊಡಗಿಕೊಂಡಿದ್ದಾರೆ. 

ಇವರ ಸಾಹಿತ್ಯ ಸೇವೆಯನ್ನು ಪರಿಗಣಿಸಿ ಹಲವಾರು ಸಂಘ-ಸಂಸ್ಥೆಗಳು ಇವರನ್ನು ಅಭಿನಂದಿಸಿ ಗೌರವಿಸಿವೆ. ಡಾ.ಸುಭಾಷ್ ಭರಣಿ ಯುವ ಬಳಗವು ಇವರಿಗೆ ‘ಸಾಹಿತ್ಯ ರತ್ನ’ ಪ್ರಶಸ್ತಿ ನೀಡಿ ಸನ್ಮಾನಿಸಿದೆ. ರಾಮನಗರ ಜಿಲ್ಲಾಡಳಿತವು ದಿನಾಂಕ 14/-11/-2011ರಂದು ನಡೆಸಿದ ಕನಕದಾಸ ಜಯಂತಿ ಕಾರ್ಯಕ್ರಮದಲ್ಲಿಯೂ, ರಾಮನಗರ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ದಿನಾಂಕ 19-/11/-2011ರಂದು ಹಮ್ಮಿಕೊಂಡಿದ್ದ ಜಿಲ್ಲಾ ಸಾಹಿತ್ಯ ಸಮ್ಮೇಳನದಲ್ಲಿಯೂ, ರಾಮನಗರ-ಚನ್ನಪಟ್ಟಣ ನಗರಾಭಿವೃದ್ಧಿ ಪ್ರಾಧಿಕಾರವು ದಿನಾಂಕ 12-/01-/2012ರಂದು ಆಯೋಜಿಸಿದ್ದ ಸ್ವಾಮಿ ವಿವೇಕಾನಂದ ಜಯಂತಿ ಸಮಾರಂಭದಲ್ಲಿಯೂ ಮತ್ತು ರಾಮನಗರದ ಸಂಸ್ಕೃತಿ ಸೌರಭ ಟ್ರಸ್ಟ್ ವತಿಯಿಂದ ದಿನಾಂಕ: 23-/03/-2012ರಂದು ಏರ್ಪಡಿಸಲಾಗಿದ್ದ ಯುಗಾದಿ ಸಾಂಸ್ಕೃತಿಕ ಉತ್ಸವ ಕಾರ್ಯಕ್ರಮದಲ್ಲಿಯೂ ಸಾಹಿತ್ಯ ಕ್ಷೇತ್ರಕ್ಕೆ ಇವರು ಸಲ್ಲಿಸುತ್ತಿರುವ ಸೇವೆಗಾಗಿ ಇವರನ್ನು ಸನ್ಮಾನಿಸಿ ಗೌರವಿಸಲಾಗಿದೆ.

ಇವರ ಪ್ರಕಟಿತ ಸಾಹಿತ್ಯ:  ಕಪ್ಪು ಬಾನ ಬೆಳ್ಳಿ ಚುಕ್ಕಿ, ಚಿಲ್ಲರೆಗಳು ಸದ್ದು ಮಾಡುತ್ತವೆ, ಬೆವರಿನ ದನಿಗಳು, ಮೃಗಾವತಾರಿ (ಕವನ ಸಂಕಲನಗಳು), ಕನಸಿನ ರಾಶಿ (ಜಿ.ಶಿವಣ್ಣ ಕೊತ್ತೀಪುರ ಅವರ ಕವಿತೆಗಳ ಜೊತೆಗಿನ ಕಾವ್ಯ ಸಂಕಲನ), ಕಥೆಗಾರ, ಅಜ್ಜ ನೆಟ್ಟ ಆಲದ ಮರ (ಆಕಾಶವಾಣಿ ಪ್ರಸಾರಿತ ನಾಟಕಗಳು), ಕೊರಳು ಕೊಯ್ದವರು, ಪ್ಯಾಟೆ ಪುರಾಣ, ನ್ಯಾಯಕ್ಕೇ ನೇಣು, ಉದುರ್ಯಾವೆ ಕನಸು ಉಡಿ ತುಂಬ, ಬರಡಾದ ಬದುಕು (ನಾಟಕಗಳು), ನುಡಿದೀಪ, ಮೊದಲುಳುಮೆ (ಲೇಖನ ಸಂಕಲನಗಳು), ಹರಿವ ಹೊಳೆ, ಕಾವ್ಯ ಕಾರಂಜಿ (ಸಂಪಾದಿತ ಕೃತಿಗಳು), ಸೇವಾಭಿನಂದನ (ಹಿರಿಯ ವೈದ್ಯರಾದ ಡಾ.ಎಸ್.ಎಲ್.ತಿಮ್ಮಯ್ಯ ಅವರ ಅಭಿನಂದನಾ ಗ್ರಂಥದ ಸಂಪಾದಕ ಮಂಡಳಿ ಸದಸ್ಯ), ಕಟ್ಟುಗಳ ಕಳಚುತ್ತ (ಬೇಲೂರು ರಘುನಂದನ್ ಅವರ ಕಟ್ಟುಪದಗಳನ್ನು ಕುರಿತ ವಿಮರ್ಶಾ ಲೇಖನಗಳ ಸಂಕಲನದ ಸಂಪಾದಕ).

ರಾಮನಗರ ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ವತಿಯಿಂದ ಜನವರಿ 31ರಂದು ಕೂಟಗಲ್‌ ಹೋಬಳಿಯ ಶಾನುಭೋಗನಹಳ್ಳಿಯಲ್ಲಿ ನಡೆಯುವ ಆರನೆಯ ತಾಲ್ಲೂಕು ಸಾಹಿತ್ಯ ಸಮ್ಮೇಳನದ ಸಮ್ಮೇಳನಾಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ.

ಬರಹ–ನೀರು